સોમનાથ મહાદેવ મંદિરનો આજે પ્રાણ પ્રતિષ્ઠા દિવસ

 Download PDF

·        ભારતની અસ્મીતાના પ્રતિક સમાન

·        તે સમયે મહાદેવને વિશ્વની ૧૦૮ નદી અને સમુદ્રના જળનો કરાયો હતો અભિષેક

ભારતના બાર દિવ્ય શિવજ્યોતિર્લિંગમાના પ્રથમ દેવાધિદેવ ભગવાન શ્રી સોમનાથ મહાદેવ મંદિરનો તીથી પ્રમાણે આજે પ્રાણપ્રતિષ્ઠા દિવસ તા. ૧૧મે ૧૯૫૧ અને તે સમયની વૈશાખ સુદ પાંચમના રોજ ભારતના તત્કાલીન રાષ્ટ્રપતિ ડો. રાજેન્દ્રપ્રસાદના વરદ હસ્તે સવારે ૯.૪૬ મીનીટે પ્રાણ પ્રતિષ્ઠા કરવામાં આવી હતી.

આ દિવસના અનુસંધાને પ્રતિવર્ષ તિથી અને તારીખ મુજબ સોમનાથ મહાદેવ મંદિરે મહાપૂજા, ધ્વજારોહણ, દિપમાળા, વિશેષ શણગાર અને ખાસ અભિષેકથી પ્રતિષ્ઠા દિન ઉજવાય છે. સોમનાથ મહાદેવ મંદિરનું નિર્માણ સદીની મહાન ઘટનાઓમાં ગણાય છે. સોમનાથ મહાદેવ પ્રાણપ્રતિષ્ઠા સમયે તે સમયે ભોળાનાથ ભગવાનને વિશ્વની ૧૦૮ નદી સમુદ્રના જળનો અભિષેક કરવામાં આવ્યો હતો.

૧૯૪૭માં ભારત આઝાદ થયું અને ૧૩ નવેમ્બરે કારતક સુદ એકમના સાપરમાં પર્વે ભારતના સપુત વલ્લભભાઇ પટેલે સોમનાથ ખાસ આવ્યા અને તે મંદિરની દુર્દુશા ખંડેર જોઇ તેનું હૃદય દ્રવી ઉઠયું તુરંત જ સોમનાથ સમુદ્ર સ્થળે પહોચી હાથમાં સમુદ્રના જળની અંજલી લઇ સંકલ્પ કર્યો કે સોમનાથ મંદિરનું પુનઃ નિર્માણ થવું જ જોઇએ.

૧૯ એપ્રિલ ૧૯૫૦ના રોજ તત્કાલીન સૌરાષ્ટ્રના મુખ્યમંત્રી ઢેબરભાઇના હસ્તે જુના ખંડિત મંદિરના સ્થાને ભૂમિ ખનન વિધી કરી અને મંદિરનું નવસર્જન થયું ૮ મે ૧૯૫૦ના રોજ નવાનગરના મહારાજા જામસાહેબ વરદ હસ્તે શિલાન્યાસ થયો અને ૧૯૫૧, ૧૧મી મે વૈસાખ સુદ પાંચમે નવનિર્મિત મંદિરમાં શિવલિંગ પ્રાણપ્રતિષ્ઠા થઇ હતી.

માત્ર ૮ વર્ષની વયે શંકરાચાર્યજીએ દ્વારકામાં સ્થાપી હતી શારદાપીઠ

 Download PDF

• ·        આજે દ્વારકામાં ઉજવાશે આદિ શંકરાચાર્યની જન્મ જયંતી
• ·        રાજા સુધન્વાને અપાયેલા તામ્રપત્રમાં શારદાપીઠની સ્થાપનાનો ઉલ્લેખ; એ સમયે દ્વારકાએ પશ્ચિમ ભારતની રાજ

સંસ્કૃતને દેવભાષા તરીકે ઓળખવામાં આવે છે. ભારતીય સંસ્કૃતિમાં જીવનમુલ્યો આધારિત વૈદિક શિક્ષણનો ધર્મધ્વજ ફરકારવવાનું કામ સૈકાઓ અગાઉ આદિ શંકરાચાર્યજીએ કર્યું હતું. દ્વારકામાં તેઓએ ૮ વર્ષની ઉંમરે શારદાપીઠની સ્થાપના કરી સંસ્કૃત ભાષાના પ્રશિક્ષણનો પ્રારંભ કર્યો હતો જે કામ આજે પણ સંસ્કૃત પ્રેમી વિદ્વાનો માટે આકર્ષણરૃપ બની રહ્યું છે.

આદિ શંકરાચાર્યજીએ પશ્ચિમ ભારતમાં પોતાની પ્રથમ પીઠ અહીં આઠમી સદીમાં સ્થાપી હોવાનો ઉલ્લેખ જોવા મળે છે. તેનું નામ શારદાપીઠ રાખવામાં આવ્યું હતું. પછી થી તેમણે પોતાના શિલ્ય મંડન મિશ્રને સુરેશ્વરાચાર્ય નામ આપી આ પીઠના પ્રથમ શંકરાચાર્ય તરીકે નિમ્યા હતા. દ્વારકાએ સમયે પશ્ચિમ ભારતની રાજધાની ગણાતી હતી. તેથી અહીં જૈન, વૈષ્ણવ, શિવા સુર્ય અને સાકત સંપ્રદાયના મહાન તિર્થ આવેલા હોવાથી આદિ શંકરાચાર્યે અહીં પીઠની સ્થાપના કરી હતી. આદી શંકરાચાર્ય ઉપરાંત રામાનુજાચાર્ય, ચૈતન્ય મહાપ્રભુ, મીરાબાઇ, નરસિંહ મહેતા જેવા ભકતો કબીર અને ગુરૃનાનક જેવા સંતોએ પણ દ્વારકાનગરીની યાત્રા કરી હતી.

આદિ શંકરાચાર્યની જન્મ જયંતીની તા. ૨૦ એપ્રિલના દ્વારકા ખાતે ઉજવણી થનાર હોવાનું જણાવી દ્વારકાધીશ સંસ્કૃત એકેડમી એન્ડ ઇન્ડોલોનું રીસર્ચ ઇન્સ્ટીટયૂટના પથદર્શક પ્રા. જયપ્રકાશ દ્વિવેદી જણાવે છે કે, આદિ શંકરાચાર્યએ દ્વારકામાં શારદાપીઠની સ્થાપના કરી હતી. તેનો ઉલ્લેખ તામ્રપત્રમાં જોવા મળે છે. એ સમયના રાજા સુધન્વાને અપાયેલા તામ્રપત્રમાં સનાતન ધર્મન્ત સ્થાપના માટે શારદાપીઠની સ્થાપના કરવામાં આવી હોવાનો ઉલ્લેખ જોવા મળે છે.

સૌરાષ્ટ્ર યુનિ.ની સ્થાપના પૂર્વે અહીં સંસ્કૃત મહાવિદ્યાલયની સ્થાપના થઇ હતી. એ સમયે અમદાવાદની યુનિવર્સિટી સામે જોડાણ હતું. હવે સોમનાથ સંસ્કૃત યુનિવર્સિટી સાથે સંસ્કૃત ભાષાના અભ્યાસ, સંવર્ધન, સંશોધનનું કામ ચાલે છે. આદિ શંકરાચાર્ય દ્વારા રચિત સાહિત્ય જૂદા જૂદા ૨૫૦ જેટલા પુસ્તકોમાં જોવા મળે છે. જેમાં ન બહુ પ્રચલિત નર્મદા અષ્ટક્રમ તેઓએ નર્મદાના કાંઠે રચ્યુ હોવાની સંભાવના છે. આદિ શંકરાચાર્યએ માત્ર ૮ વર્ષની ઉંમરે અહીં આવી શારદાપીઠની જે સ્થાપના કરી વૈદિક ધર્મના પ્રચાર - પ્રસારનું કામ હાથ ધર્યું હતું. તે આજે તેમના ઉત્તરાધિકારી એવા ૭૮માં શંકરાચાર્ય સ્વરૃપાનંદ સરસ્વતીજી દ્વારા દેશભરમાં આગળ વધતું રહ્યું છે.

મિસિસ ઇન્ડિયા પેજન્ટમાં વડોદરાની પરિણીત સુંદરી રનર અપ બની

 Download PDF

110 કિલો વજન હતુ અને દ્રઢ નિશ્ચયથી 50 કિલો વજન ઉતાર્યુ.

દિલ્હી ખાતે તાજેતરમાં સંપન્ન થયેલી મિસિસ ઇન્ડિયા ક્વીન ઓફ સબસ્ટન્સ પેજન્ટમાં વડોદરાની પરિણીત સુંદરી મેધા એન્જિનિયર સેકન્ડ રનર્સ અપ બની છે. મેધા મૂળ વડોદરાની જ છે અને ૧૬ વર્ષ યુએસ અને કેનેડામાં રહ્યા બાદ પરત વડોદરા આવી છે.

રોજ નિયમિત એક્સરસાઇઝ અને હળવા ખોરાક દ્વારા મેં મારા વજનમાં ૫૦ કિલોનો ઘટાડો કર્યો
પોતાની આ સિદ્ધી અંગે મેધાએ કહ્યું હતું કે 'બીજી સ્ત્રીઓની જેમ મને મારી ઉમર  બતાવતા શરમ નથી આવતી હું ૪૦ વર્ષની છું અને મે પેજન્ટમાં એટલા માટે ભાગ લીધો કે ભારતીય સ્ત્રીઓ અને ખાસ કરીને ગુજરાતી સ્ત્રીઓને મેસેજ આપવા માગુ છું કે લગ્ન કરીને માતા બન્યા બાદ જીવન પુરૃ થતુ નથી હકિકતે તે પછી બીજી ઇનિંગ શરૃ થાય છે. રોજ એક કલાક એક્સરસાઇઝ કરો અને શુધ્ધ તથા હળવો ખોરાક લેવાથી તમે પણ વિશ્વ સુંદરી બની શકો છો.

બે વર્ષ પહેલા હું કેનેડામાં હતી ત્યારે મારૃ વજન ૧૧૦ કિલો હતું. ત્યાના લોકોની ફિટનેસ પ્રત્યેનો પ્રેમ જોઇને હું પણ પ્રેરાઇ અને મે એક્સરસાઇઝ અને હળવા ખોરાકથી ૫૦ કિલો વજન ઓછુ કરી નાખ્યું અને કેનેડાની નેશનલ ફિટનેસ કોમ્પિટિશનમાં છઠ્ઠા નંબર પર વિજેતા થઇ.

વડોદરા રિટર્ન આવ્યા બાદ મારા પતિ અનુપે મને મિસિસ ઇન્ડિયા કોમ્પિટિશનમાં ભાગ લેવા માટે પ્રેરણા આપી અને વિવિધ રાઉન્ડના અંતે એનઆરઆઇ અને ભારતની મળીને ૪૫ સુંદરીઓ વચ્ચેની કોમ્પિટિશનમાં હું સેકન્ડ રનર અપ વિજેતા થઇ'.

આજે (18/04) વલ્ડૅ હેરિટેજ ડે

 Download PDF

રાણકી વાવ સહિતના ઐતિહાસિક સ્થાપત્યોની જાળવણીમાં સરકાર નીરસ

પાટણના સોલંકી રાજવી ભીમદેવ પહેલાની યાદમાં  રાણી ઉદયમતીએ 11મી સદીમાં બંધાવેલો શિલ્પ અને સ્થાપત્યનો અદભૂત નમૂનો એટલે રાણકી વાવ.  

2014માં વલ્ડૅ હેરિટેજ સાઈટ તરીકે જાહેર કરવામાં આવી.

          

 ઇતિહાસ

      અણહિલવાડ પાટણના સોલંકી વંશના સ્થાપક મૂળરાજના પુત્ર ભીમદેવ પહેલા ની રાણી ઉદયમતીએ ૧૧ મી સદીના અંતિમ ચતુર્થાસમાં પ્રજા માટે પાણીની વ્યવસ્થા ઉભી કરવા ૬૮ મી. લાંબી સાત માળની ર૭ મી. ઉંડી વાવનું નિર્માણ કરાવ્યું હતું.

      સદીઓ અગાઉ સરસ્વતી નદીમાં આવેલા પુર અને અન્ય ઘટનાક્રમથી આ વાવ જમીનમાં દફન થઈ ગઈ હતી. જેથી ધરતી તળે દબાયેલી આ વાવ પર કોઈની નજર પહોંચી શકી ન હતી. પરંતુ, ર૦ મી સદી સુધી લોકોથી અલિપ્ત રહેલી આ વાવને મૂળ સ્વરૂપમાં લાવવા ભારતીય પુરાતત્વ વિભાગે ઇ.સ. ૧૯૬૮માં વાવમાં ભરાયેલ માટીને બહાર લાવવા માટે ઉત્ખનની કાર્યવાહી આરંભતા ઘણા વર્ષો બાદ વાવ તેના મૂળ સ્વરૂપમાં આવી હતી.

બ્રિટનના PM સાથે વડાપ્રધાન મોદીએ કરી મુલાકાત

 Download PDF

- મોટી સંખ્યામાં હાજર સમર્થકોએ મોદી-મોદીના નારા લગાવ્યા

કોમનવેલ્થ હેડ્સ ઓફ ગવર્નમેન્ટ મીટિંગમાં ભાગ લેવા વડાપ્રધાન નરેન્દ્ર મોદી લંડનની મુલાકાતે છે. વડાપ્રધાન મોદીના યુકેના PM થેરેસા મે સાથે બ્રેકફાસ્ટ દરમિયાન મુલાકાત કરી. આ મુલાકાત દરમિયાન સમર્થકોએ મોદી-મોદીના નારા લગાવ્યા.

PM મોદીએ બ્રિટનના વડાપ્રધાનને કહ્યું મને વિશ્વાસ છે કે આજની મુલાકાત બાદ આપણા સંબંધોમાં એક નવી ઉર્જા જોડાશે. મને ખુશી છે કે બ્રિટન પણ ઈન્ટરનેશનલ સોલર અલાયન્સનો ભાગ છે.

મારુ માનવુ છે કે આ લડત માત્ર ક્લાઈમેટ ચેન્જને લઈને નથી પરંતુ આવનાર પેઢીને લઈને અમારી જવાબદારી છે. આ અવસરે યુકેના વડાપ્રધાન થેરેસા મે એ કહ્યું કે ભારત અને યુકેના લોકો સાથે મળીને કામ કરીશુ.

સુરત, નર્મદા અને તાપી જિલ્લામાં ત્રણ સફારી પાર્ક વિકસાવાશે

 Download PDF

- સૈધ્ધાંતિક મંજૂરી બાદ બાંધકામ શરૃ કરાશે

- કુલ ૧૬ દિપડા અને ૮ વાઘને તેમાં રખાશે: સેન્ટ્રલ ઝૂ ઓથોરીટી મંજૂરી આપશે

ગુજરાતના ત્રણ જિલ્લા સુરત, નર્મદા અને તાપી ખાતે વધુ ત્રણ સફારી પાર્ક વિકસાવાશે. આ ત્રણેય જિલ્લામાં કુલ ૧૪૬ હેક્ટર વિસ્તારમાં બનનારા સફારી પાર્કની અંદર કુલ ૧૬ દિપડા અને ૮ વાઘને રખાશે. સેન્ટ્રલ ઝૂ ઓથોરિટીની સૈધ્ધાંતિક મંજૂરી મળ્યા બાદ બાંધકામ શરૃ કરાશે. આખરી મંજૂરી માટેની આખરી કામગીરી ગુજરાત સરકાર દ્વારા શરૃ કરાઈ છે.

આ અંગે વનમંત્રી ગણપતસિંહ વસાવાએ જણાવ્યું કે, વન્યપ્રાણી સંરક્ષણ અને સંવર્ધન માટે રાજ્યનાં ૨૩ અભયારણ્યો તથા ૪ રાષ્ટ્રીય ઉધાનો તથા ૧ કન્ઝર્વેશન રીઝર્વ મળીને કુલ ૨૮ રક્ષિત વિસ્તારો છે. રાજ્યનો કુલ ૧૭૩૨૬.૯૩ ચો.કી. મીટર વિસ્તારને અભયારણ્ય તથા રાષ્ટ્રીય ઉધાન તરીકે રક્ષિત કરાયો છે. છેલ્લી વસતી અંદાજ મુજબ બૃહદ ગીરમાં ૫૨૩ જેટલા સિંહો અને જુદા જુદા જિલ્લામાં અંદાજે ૧૩૯૫ દિપડા તથા ૩૪૩ રીંછ નોંધાયેલા છે.

તેઓએ કહ્યું કે લોક જાગૃતિ મારફતે વન્યપ્રાણીઓને સંરક્ષણ પૂરું પાડવા લોક સહકાર મળી શકે તે હેતુથી રાજ્યમાં ત્રણ સફારી પાર્ક બનાવાશે. આ વર્ષના બજેટમાં તેના માટે ટોકન જોગવાઈ કરાઈ છે. સુરતના માંડવી તાલુકાનાં ખોડંબા ખાતે ૫૦ હેક્ટરમાં સફારી પાર્ક બનશે. જેમાં ૧૦ દિપડા રખાશે. જ્યારે ડાંગ જિલ્લાના વઘઈ તાલુકાના ડોક પાતળ ખાતે ૩૨ હેક્ટરમાં બનનારા પાર્કમાં ૬ દિપડા મુકાશે. જ્યારે નર્મદાના તિલકવાડા તાલુકાનાં કાકડીયા ગામે ૬૪ હેક્ટરમાં થનારા સફારી પાર્કમાં ૮ વાઘ મુકાશે.

મંત્રીએ કહ્યું કે, સેન્ટ્રલ ઝૂ ઓથોરીટીની મંજૂરીમાં પ્રથમ તબક્કે સૈધ્ધાંતિક મંજૂરી મેળવ્યા બાદ બાંધકામ શરૃ કરી શકાય છે. તમામ બાંધકામ પૂર્ણ થયા બાદ આખરી મંજૂરી મેળવવી વન્યપ્રાણીઓને પ્રદર્શન માટે સફારી પાર્કમાં રાખી શકાય છે.

આંબરડી સફારી પાર્કમાં વધુ એક સિંહ અને ચાર સિંહણ રાખવા મંજૂરી

અમરેલી જિલ્લામાં ધારીથી ૬ કીલોમીટર દૂર આંબરડી સફારી પાર્ક છે. સેન્ટ્રલ ઝૂ ઓથોરિટીએ ૫-૬-૧૭ના રોજ આંબરડી સફારી પાર્કને આખરી મંજૂરી આપી હતી. આ પાર્કનો કુલ વિસ્તાર ૩૮૬ હેક્ટરનો છે. આ પાર્કમાં હાલમાં એક સિંહ તથા બે સિંહણ દર્શન માટે રાખેલા છે. કેન્દ્ર સરકાર દ્વારા તાજેતરમાં જ વધુ એક સિંહ તથા ચાર સિંહણ મળીને કુલ પાંચ વન્ય પ્રાણીને રાખવાની મંજૂરી આપી છે. પ્રવાસીઓ માટે અહીં ૨૦ સીટની ત્રણ બસો પણ મુકાઈ છે. ઓક્ટોબર- ૨૦૧૭થી માર્ચ ૨૦૧૮ના અંત સુધીમાં કુલ ૪૪૯૪૬ પ્રવાસીઓએ મુલાકાત લીધી હતી.

આજે વણજોયા મુહૂર્તનો દિવસ અખાત્રીજ મહાલક્ષ્મી-સરસ્વતીના પૂજનનો શુભ દિવસ

 Download PDF

- આજે ભગવાન પરશુરામ જયંતી પણ આસ્થા-ઉલ્લાસપૂર્વક ઉજવાશે

- અમદાવાદમાં ભગવાન જગન્નાથ મંદિરમાં રથપૂજન કરાશે : આ વખતે અખાત્રીજે લગ્નનાં કોઇ મુહૂર્ત નથી

વર્ષમાં કેટલાક જ દિવસ એવા આવે છે જેમાં શુભ કાર્ય કરવાનો સમય જોવા માટે ચોઘડિયા જોવાની જરૃર રહેતી નથી. આવા વણજોયા મુહૂર્તના દિવસમાં અખા ત્રીજનો પણ સમાવેશ થાય છે. સામાન્ય રીતે અખા ત્રીજે ખૂબ જ લગ્નપ્રસંગ પણ યોજવામાં આવતા હોય છે. અખાત્રીજ એ  મહાલક્ષ્મી-સરસ્વતીના પૂજનનો શુભ દિવસ છે.

શાસ્ત્રવિદોની દ્રષ્ટિએ અખા ત્રીજનું ખૂબ જ મહત્વ છે. આ દિવસે અક્ષત્ કહેતા ચોખાથી ભગવાનનું પૂજન કરનામાં આવે છે. મહાભારતનું યુદ્ધ પૂર્ણ થયું ત્યારે પણ અખા ત્રીજની તિથિ હતી. આ ઉપરાંત આ દિવસે જ ભગવાન પરશુરામનું પ્રાગટય થયું હતું.

વૈષ્ણવ ધર્મમાં વૃંદાવનમાં બાંકે બિહારીના દર્શન પણ અખા ત્રીજના દિવસે જ થાય છે. જગન્નાથ પુરી અને અમદાવાદમાં જે પ્રસિદ્ધ રથયાત્રા યોજાય  છે રથના નિર્માણ કાર્યનો પણ આ જ દિવસે પ્રારંભ થતો હોય છે. અમદાવાદમાં આ રથપૂજન મહંત દિલીપદાસજી મહારાજની નિશ્રામાં ઉજવાશે. આ વખતે અધિક જેઠ મહિનો આવતો હોવાથી રથયાત્રાની તૈયારી માટે એક મહિનો વધુ મળી ગયો છે.

સાધુ પ્રેમવત્સલદાસે જણાવ્યું હતું કે, 'સ્વામિનારાયણ ભગવાને વચનામૃત ગ્રંથના છેલ્લા પ્રકરણના ૨૩મા વચનામૃતમાં કહ્યું છે કે ઋતુ અનુસાર ભગવાનની ચાકરી કરવી જોઇએ. વૈશાખ માસની અસહ્ય ગરમીમાં ભગવાનને ઠંડક પ્રાપ્ત થાય તેના માટે ચંદનના વાઘાના શણગારથી સજાવવામાં આવે છે.

આજે જૈનો  વર્ષીતપના પારણાં કરશે

અખા ત્રીજના દિવસે જૈનો દ્વારા વર્ષી તપના પારણા કરવામાં આવતા હોય છે. આદિનાથ ભગવાને દીક્ષા ગ્રહણ કર્યા પછી ૧૩ માસ ૧૦ દિવસ સુધી અખંડ તપની આરાધના કરી હતી અને તેમની સ્મૃતિમાં આજ પર્યંત વર્ષી તપની આરાધના કરવામાં આવે છે. આ તપ સૌથી જૂનું અને મોટામાં મોટું તપ છે. જૈન આરાધકો અત્યંત શ્રદ્ધાથી આ તપની આરાધના કરે છે અને શેરડીના રસથી પારણું કરે છે. જે પણ જૈન દેરાસરોમાં આદિનાથ પ્રભુની સ્થાપના થઇ હશે ત્યાં આજે શેરડીના રસનો પ્રક્ષાલ કરાશે. ઋષભદેવ ભગવાનના પારણાનો દિવસ અક્ષય તૃતિયાનો જ હતો. સમગ્ર દેશમાંથી ૫ હજારથી ૧૦ હજાર ભાવિકો આવો તપ પૂર્ણ કરશે.