Friday, 3 August 2018


આસામમાં લાખો લોકો માટે 7 ઓગસ્ટ સાબીત થશે રેડ લેટર ડે


- જેમના નામ રજિસ્ટરમાં નથી તેઓને નાગરિક હોવાનો દાવો કરવાની તક મળશે

આસમમાં વસી ગયેલા બાંગ્લાદેશી ઘૂસણખોરોને ઓળખવા માટે બનાવાયેલા નેશનલ રજિસ્ટર ઓફ સિટિઝન પરનો વિવાદ ચાલુ છે ત્યારે 7 ઓગષ્ટનો દિવસ આસામમાં વસનારા હજારો લોકો માટે રેડ લેટર ડે સાબીત થશે.

કારણકે આ જ દિવસે રજિસ્ટરમાં જેમના નામ નથી તેવા લગભગ 40 લાખ લોકો 2500 એનઆરસી સેન્ટર પર જઈને જાણી શકશે કે તેમનુ નામ લિસ્ટમાં કયા કારણસર નથી.

એવી આશા રખાઈ રહી છે કે આ દિવસથી શરુ થનારા NRC ક્લેમમાં કેટલાકના રાહત મળશે તો કેટલાકને ગેરકાયદેસર રીતે રહેતા હોવાનુ લેબલ લાગશે.

બીજી તરફ 39 વિદેશી પરિવારો એવા પણ છે જેમના નામ ભૂલથી એનઆરસીમાં સામેલ થઈ ગયા છે.આ અંગે તંત્રનુ કહેવુ છે કે આ પરિવારોના નામ ફાઈનલ લિસ્ટથી હટાવવામાં આવશે.

દરમિયાન કોર્ટે એનઆરસી કો ઓર્ડિનેટરને નિર્દેશ આપ્યો છે કે જેમના નામ લિસ્ટમાં નથી તેમના દાવાની નિષ્પક્ષ રીતે ચકાસણી કરવામાં આવે.આવા લોકો એનઆરસી સમક્ષ પોતાનો દાવો 30 ઓગષ્ટથી રજૂ કરી શકશે અને તેની ચકાસણી 28 સપ્ટેમબર સુધીમાં પુરી કરાશે.

આ માટે 2500 સેવા કેન્દ્રો પર ફોર્મ ઉપલબ્ધ કરાવાશે.લોકોના થનારા ધસારાને ધ્યાનમાં રાખીને આ કેન્દ્રો પર કડક સુરક્ષા વ્યવસ્થા ઉભી કરવામાં આવશે.


ભારતે સુપરસોનિક ઇન્ટરસેપ્ટર મિસાઇલનું સફળ પરિક્ષણ કર્યું




- ૭.૫ મીટર લાંબી મિસાઇલમાં નેવિગેશન સીસ્ટમ અને હાઇ-ટેક કોમ્પ્યુટર ફીટ કર્યા છે


ભારતે કેટલાક સુધારા સાથેની દેશી બનાવટની સુપરસોનિક ઇન્ટરસેપ્ટર મિસાઇલનું ઓડિશાના કિનારે થી સફળતાપૂર્વક પરીક્ષણ કર્યું હતું. નીચલા સ્તરે પણ પ્રહાર કરી શકે એવી આ સ્ટેટ ઓફ આર્ટ મિસાઇલ સવારે ૧૧-૨૪ મિનિટે છોડવામાં આવી હતી, એમ સૂત્રોએ કહ્યું હતું.હજુ સુધી જેનું નામકરણ કરવામાં આવ્યું નથી તે આધુનિક હવાઇ સુરક્ષા મિસાઇલ ઇન્ટરસેપ્ટરને ડો. અબ્દુલ કલામ આઇલેન્ડના ઇન્ટીગ્રેટેડ ટેસ્ટ રેન્જના લોચપેડ-ચાર પરથી છોડવામાં આવી હતી.



મલ્ટી લેયર બેલાસ્ટિક મિસાઇલ સુરક્ષા પધ્ધતી વિકસાવવાના  પ્રયાસના એક ભાગરૃપે બનાવવામાં આવેલી આ મિસાઇલ છોડવામાં આવેલા મિસાઇલને હવામાં જ તોડી નાંખવાની ક્ષમતા ધરાવે છે.

'મિસાઇલમાં સૌથી અગત્યની બાબત છે તેની 'કિલ' અસરકારકતા તેને અગાઉના પરીક્ષણમાં પણ વેલિડ કરી લેવામાં આવી હતી. આજે કરાયેલા પરીક્ષણમાં સીસ્ટમમાં દાખલ કરેલા નવા  ફીચરનું પરીક્ષણ કરવામાં આવ્યું હતું'એમ સૂત્રે કહેલું.



આ ઇન્ટરસેપ્ટર ૭.૫ મીટર લાંબો સિંગલ સ્ટેજ સોલિડ રોકેટ પ્રોપેલર છે જેમાં નેવીગેશન સીસ્ટમ પણ ફીટ કરવામાં આવી હતી. આ ઇન્ટરસેપ્ટરનું પોતાનું મોબાઇલ લોન્ચર છે જે ઇન્ટરસેપ્ટર માટે ડેટાને જોડશે. તેનું રાડાર અત્યંત આધુનિક છે.