ધોલેરામાં ૫૦૦૦ મેગાવૉટનો વિશ્વનો સૌથી વિશાળ સોલાર પાર્ક સ્થપાશે

 Download PDF

 

- મુખ્યમંત્રી દ્વારા સૈદ્ધાંતિક મંજૂરી અપાઇ

- ૨૦ હજારથી વધુ યુવાનોને રોજગારી મળશે ૨૫ હજાર કરોડનું જંગી મૂડીરોકાણ થશે

ધોલેરા SIR માં વિશ્વનો સૌથી વિશાળ એટલે કે ૫૦૦૦ મેગાવોટનો સોલાર પાર્ક સ્થપાશે. મુખ્યમંત્રી વિજય રૃપાણી દ્વારા આ પ્રોજેક્ટની સૈદ્ધાંતિક મંજૂરી આપી દેવાઇ છે. પર્યાવરણ પ્રિય ગ્રીન ફિલ્ડ ટેકનોલોજી આધારીત વિકાસમાં સોલાર પાર્ક પુરક બનશે. ધોલેરા ઇન્ટરનેશનલ સિટી અને આસપાસનાં વિસ્તારોમાં મેન્યુફેકચરીંગ ફેસીલીટીઝની સંપૂર્ણ સપ્લાય ચેઇનની તકો ખુલશે.

વડાપ્રધાને ૨૦૨૨ સુધીમાં ૧૭૫ ગીગા વોટ ઉર્જાનું બિન પરંપરાગત સ્ત્રોત દ્વારા ઉત્પાદન કરવાનો જે મહત્વાકાંક્ષી લક્ષ્યાંક રાખ્યો છે તેમાં ગુજરાત આ વિશાળ સોલાર પાર્ક દ્વારા મુખ્યમંત્રીનાં માર્ગદર્શનમાં પ્રદાન કરાશે. ધોલેરા એસઆઈઆર પર્યાવરણ પ્રિય ગ્રીન ફિલ્ડ ટેકનોલોજી આધારીત વિકસીત થવાનો છે. તેમાં આ સોલાર પાર્ક પૂરક બનશે. ધોલેરા એસઆઇઆરમાં ખંભાતના અખાતમાં ૧૧૦૦૦ હેકટરમાં આકાર પામનારા આ સોલાર પાર્કમાં રૃ. ૨૫ હજાર કરોડનું અંદાજીત જંગી રોકાણ થવાની શક્યતા છે.

સરકારનો દાવો છે કે આ સોલાર પાર્કને પરિણામે ૨૦ હજારથી વધુ લોકોને રોજગારીનો અવસર મળશે એટલું જ નહીં, ધોલેરા ઇન્ટરનેશનલ સિટી અને આસપાસનાં વિસ્તારોમાં મેન્યુફેકચરીંગ ફેસીલીટીઝની સંપૂર્ણ સપ્લાય ચેઇન માટે મોટી તકો ઉપલબ્ધ બનશે. પ્રાથમિક અભ્યાસોમાં સોલાર ઉર્જાના ઉત્પાદન માટે અહીં વિશાળ સંભાવના દર્શાવાઈ છે.

આ પાર્કમાં સસ્ટેનેબિલિટી, રોજગાર સર્જન તથા ૧૭૫ ગીગાવોટ રિન્યુએબલ એનર્જીના સર્જનના ભારતનાં લક્ષ્યાંકને પરિપૂર્ણ કરવા માટેની કામગીરી થશે. ગુજરાતે ધોલેરામાં વિશ્વની સૌથી મોટી ગ્રીન ફિલ્ડ ઇન્ડસ્ટ્રીયલ ટાઉનશિપનું નિર્માણ કરવા માટે દિલ્હી મુંબઇ ઇન્ડસ્ટ્રીયલ કોરીડોર સાથે સરકારે ભાગીદારી કરી છે.

મુખ્યમંત્રીએ ધોલેરા સ્પેશ્યલ ઇન્વેસ્ટમેન્ટ રિજિયનમાં સોલર પાર્ક, વિન્ડ પાર્ક તેમજ અદ્યતન એરપોર્ટના નિર્માણ માટેનાં વિવિધ વિકાસલક્ષી વિષયો અંગે યોજેલી ઉચ્ચ સ્તરીય બેઠકમાં આ સૈદ્ધાંતિક મંજૂરી આપી હતી.

કોમનવેલ્થ 2018માં શુટીંગમાં મિથરવાલે મેળવ્યો બ્રોન્ઝ મેડલ

 Download PDF

- ભારત અત્યાર સુધી મેળવ્યા 11 મેડલ

કોમનવેલ્થ  2018ના સાતમા દિવસે ભારત માટે ઓમ પ્રકાશ મિથરવાલે પુરુષોની 50 મીટર પિસ્તોલ સ્પર્ધામાં બ્રોન્ઝ મેડલ જીતી લીધો છે. મિથરવાલનો આ બીજો મેડલ છે. આ અગાઉ તેણે 10 મીટર સ્પર્ધામાં પણ બ્રોન્ઝ મેડલ જીત્યો હતો. તેણે કુલ 201.1ના સ્કોર સાથે બ્રોન્ઝ પર કબ્જો જમાવ્યો.

આ સ્પર્ધામાં ગોલ્ડ મેડલ ઓસ્ટ્રેલિયાના ડેનિયલ રેપાચોલીએ મેળવ્યો. તેણે 227.2નો કુલ સ્કોર કરીને ગેમ રેકોર્ડ બનાવ્યો. જ્યારે સિલ્વર મેડલ બાંગ્લાદેશના શકીલ અહેમદે મેળવ્યો જેણે 220.5નો સ્કોર કર્યો. ભારતને આ વખતે કોમનવેલ્થ ગેમ્સમાં અત્યાર સુધી 11 ગોલ્ડ મળ્યા છે. જ્યારે 4 સિલ્વર અને સાત બ્રોન્ઝ મેડલ મળેલા છે. આ સાથે ભારતને મળેલા કુલ મેડલ્સની સંખ્યા 22 થઈ ગઈ છે. મેડલ ટેલીમાં ભારત હજુ પણ ત્રીજા સ્થાને છે. સાતમા દિવસે ભારતને બોક્સરો પાસેથી મેડલની આશા છે.

ભારતની સ્વતંત્રતામાં સશસ્ત્ર ક્રાંતિકારીઓની પણ મહત્વપૂર્ણ ભૂમિકા : મોહન ભાગવત

 Download PDF

- સરદારસિંહ રાણાની વેબસાઇટના લોન્ચિંગમાં RSSના સરસંઘચાલકનું ઉદ્બોધન

- ગોળી- પિસ્તોલવાળા તમામ લોકોને એક ત્રાજવે તોલવા જોઇએ નહીં, દેશકાળની પરિસ્થિતિ મુજબ કાર્ય કરવું પડ

સ્વ. સરદારસિંહ રાણાએ કોઇ અંગત સ્વાર્થ વિના દેશ માટે જીવન સમર્પિત કર્યું હતું. ભારતને માત્ર એક માધ્યમથી જ સ્વતંત્રતા મળી છે તેમ કહેવું સહેજપણ યોગ્ય નથી. સત્ય ક્યારેકને ક્યારેયક છાપરે ચડીને બોલે જ છે. સશસ્ત્રચારીઓએ પણ ભારતની સ્વતંત્રતામાં મહત્વની ભૂમિકા અદા કરી હતી. શસ્ત્રચારના માર્ગમાં જે લોકો હતા તેમની પણ સંખ્યા ઓછી નહોતી અને તેઓ ભારતના ખૂણે-ખૂણે હતા તેમ રાષ્ટ્રિય સ્વંયસેવક સંઘના સરસંઘચાલક મોહનરાવ ભાગવતે આજે અમદાવાદ ખાતે ક્રાંતિવીર સરદારસિંહ રાણાની વેબસાઇટ લોન્ચિંગના સમારોહમાં જણાવ્યું છે.

અમદાવાદમાં પંડીત દીનદયાળ ઉપાધ્યાય ઓડિટોરિયમ ખાતે આજે ભારતની સ્વતંત્રતામાં મહત્વનું યોગદાન આપનારા સરદારસિંહ રાણાની વેબસાઇટ www.sardarsinhrana.com નું મોહનરાવ ભાગવત દ્વારા  લોન્ચિંગ કરવામાં આવ્યું હતું. મોહનરાવ ભાગવતે જણાવ્યું હતું કે, 'આપણે સ્વતંત્રતા મેળવી છે ત્યારે હવે સ્વતંત્રતા મેળવવાથી શું પ્રાપ્ત કર્યું તે પણ વિચારવાનું છે. અગાઉ એમ જ માનવામાં આવતું કે આપણા તમામ દુ:ખનું મૂળ અંગ્રેજો જ છે. પરંતુ માત્ર અંગ્રેજોના જવાથી આપણા દુ:ખ દૂર થવાના નથી તેમ લોકો ધીરે-ધીરે અનુભવતા થયા છે.

આપણે ભારતને વિશ્વને નેતૃત્વ પૂરું પાડતું રાષ્ટ્ર બનાવીશું તો જ આપણું જીવન સુખી બનશે. ક્રાંતિવીર સરદારસિંહ રાણાની વેબસાઇટની શરૃઆત કરવી તે પ્રસંગ પુણ્ય સ્મરણ સમાન છે. ભારતની સ્વતંત્રતા માટે પ્રત્યક્ષ કે પરોક્ષ રીતે કાર્ય કર્યું છે તેમના સ્મરણથી રાષ્ટ્રભાવનાની ચોક્કસ વૃદ્ધિ થશે. ૧૮૫૭ના સ્વતંત્ર સંગ્રામ બાદ ભારતના ભાગ્યોદયનું કાર્ય પૂરજોશમાં થયું હતું. આઝાદી માટેની લક્ષ્યાંક એક હતું પરંતુ તે રાજનૈતિક, સામાજીક સુધારા, મૂળ તરફ પાછા ફરીને પોતાના વિચાર તરફ આગળ વધીને અને છેલ્લે સશસ્ત્ર ક્રાંતિ કે શસ્ત્રાચાર એમ ચાર માર્ગ દ્વારા સિદ્ધ થયું છે.

આજે શરૃ કરાયેલી વેબસાઇટ દ્વારા ક્રાંતિકારીઓ કેવા હતા તેમના મિજાજનો પરિચય થાય છે. ગોળી, પિસ્તોલવાળા તમામ લોકોને એક ત્રાજવે તોલવા જોઇએ નહીં. દેશકાળની પરિસ્થિતિ મુજબ  કાર્ય કરવું પડતું હોય છે. દેશ માટે કઇ રીતે જીવવું તેના માટે સ્વ. સરદારસિંહ રાણાનું જીવન પ્રેરણા સમાન છે. તેમણે દેશ માટે જીવન સમર્પિત કર્યું હતું પરંતુ તેમનામાં અહંકાર નહોતો. આજે લોકો ત્રણ મહિના દેખાડો કરવા માટે સારું કામ કરીને સરકાર સમક્ષ તામ્રપત્ર માટે દાવેદારી નોંધાવે છે. સ્વ. સરદારસિંહ રાણાનું એકમાત્ર લક્ષ્યાંક નિ:સ્વાર્થ ભાવના સાથે દેશ હિતનું હતું. અંગ્રેજો સામે આઝાદીની લડત વખતે વિદેશમાં રહીને સશસ્ત્ર ક્રાંતિ માટે સંખ્યાબંધ ક્રાંતિકારીઓને સરદારસિંહ રાણાએ તૈયાર કર્યા હતા. '  

આ પ્રસંગે રાજ્યપાલ ઓ.પી.કોહલી, નાયબ મુખ્યમંત્રી નીતિન પટેલ, પૂર્વ મુખ્યમંત્રી કેશુભાઇ પટેલ,  મેયર ગૌતમ શાહ, શિક્ષણમંત્રી ભૂપેન્દ્રસિંહ ચુડાસમા, રાજેન્દ્રસિંહ રાણા, દિગ્વિજયસિંહ રાણા, પ્રતાપસિંહ રાણા, ભાજપના પ્રદેશ પ્રમુખ જીતુભાઇ વાઘાણી, આઇ.કે.જાડેજા, જયંતિ ભાડેસિયા સહિતના મહાનુભાવો ઉપસ્થિત રહ્યા હતા. રાજ્યપાલ ઓ.પી. કોહલીએ જણાવ્યું કે, 'ઘણા લોકો સરદારસિંહના યોગદાનથી અજાણ છે, તેમના માટે આ વેબસાઇટ ખૂબ જ ઉપયોગી રહેશે. પોતાના જીવનકાળના લગભગ ૫૦ વર્ષ ભારત બહાર રહીને દેશની આઝાદી માટે લડત ચલાવવી તે અસાધારણ કાર્ય છે. '

૧૯૦૭માં જર્મનીમાં ફરકાવાયેલો તિરંગો રજૂ કરાયો

આજે વેબસાઇટ લોન્ચિંગના સમારોહ દરમિયાન ૧૯૦૭માં જર્મનીમાં મેડમ કામાએ સરદારસિંહ રાણા સાથે જે સૌપ્રથમ તિરંગો બનાવીને ફરકાવ્યો હતો તેના ત્રણ સેટમાંથી એક તિરંગો પણ વિશેષ આકર્ષણ તરીકે મૂકવામાં આવ્યો હતો. ઉલ્લેખનીય છે કે, સરદારસિંહ રાણા ક્રાંતિકારી ચળવણના અનસંગ હીરો છે. શ્યામજી કૃષ્ણ વર્મા, મેડમ કામા સાથે મળીને તેમણે ક્રાંતિકારી ચળવળ શરૃ કરી હતી. ભારતમાં બોમ્બ, પિસ્તોલની ક્રાંતિ માટે આ ત્રિપુટીનો મોટો ફાળો હતો. તેમના દ્વારા શરૃ કરાયેલી સ્કોલરશીપ યોજનાનો વીર સાવરકર સહિત અનેક લોકોએ લાભ મેળવ્યો હતો.

કોમનવેલ્થમાં શૂટિંગમાં ભારતને હીના સિધ્ધુએ અપાવ્યો ગોલ્ડ મેડલ

 Download PDF

- આ સાથે જ ભારતે મેળવેલ ગોલ્ડ મેડલની કુલ સંખ્યા 11

કોમનવેલ્થ ગેમ્સમાં હીના સિધ્ધુએ શૂટિંગમાં ભારતને ગોલ્ડ મેડલ અપાવ્યો છે.

કોમનવેલ્થ ગેમ્સ 2018ના છઠ્ઠા દિવસે શૂટિંગમાં ભારત માટે સારા સમાચાર આવ્યા છે. 25 મીટર પિસ્ટલ ઇવેન્ટમાં હીના સિદ્ધુએ ભારતને ગોલ્ડ અપાવ્યો છે. તેની સાથે જ ભારતના ગોલ્ડ મેડલની કુલ સંખ્યા 11 થઈ ગઈ છે. હિનાએ ફાઇનલમાં રેકોર્ડ 38 અંક નોંધાવ્યા. આ પહેલા હિનાએ મહિલાઓની 10 મીટર એર પિસ્ટલમાં સિલ્વર મેડલ જીત્યો હતો.

કોમનવેલ્થ ગેમ્સમાં ભારતનો ગોલ્ડન ડે : સુરતના હરમીત દેસાઇનો ટેબલ ટેનિસમાં ગોલ્ડ મેડલ

 Download PDF

                                            

- શૂટિંગ, બેડમિન્ટન અને ટેબલ ટેનિસમાં તરખાટ

- ભારતને સતત બીજા દિવસે ત્રણ ગોલ્ડ મેડલ: ભારત ૧૦ ગોલ્ડ, ચાર સિલ્વર, ૫ાંચ બ્રોન્ઝ સાથે મેડલ ટેબલમાં

ઓસ્ટ્રેલિયાના ગોલ્ડકોસ્ટ ખાતે યોજાઇ રહેલી કોમનવેલ્થ ગેમ્સમાં ભારતનો શાનદાર દેખાવ જારી રહ્યો છે. ભારતે આજે ૩ ગોલ્ડ, બે સિલ્વર, બે બ્રોન્ઝ એમ કુલ સાત મેડલ હાંસલ કર્યા હતા. આ સાથે જ ભારતે  મેડલ ટેબલમાં ૧૦ ગોલ્ડ, ૪ સિલ્વર, ૫ બ્રોન્ઝ સાથે મેડલ ટેબલમાં ત્રીજું સ્થાન મેળવી લીધું છે. યજમાન ઓસ્ટ્રેલિયા ૩૯ ગોલ્ડ સાથે મેડલ ટેબલમાં મોખરે છે.

ભારતને આજે ગોલ્ડ મેડલ અપાવવામાં સુરતના પ્રતિભાશાળી ટેબલ ટેનિસ પ્લેયર હરમીત દેસાઇએ પણ મહત્વની ભૂમિકા અદા કરી હતી. ટેબલ ટેનિસની મેન્સ ટીમ ઇવેન્ટમાં ગોલ્ડ મેડલ જીતનારી ભારતીય ટીમમાં હરમીત દેસાઇનો પણ સમાવેશ થતો હતો. મેન્સ ડબલ્સની ફાઇનલમાં હરમીત દેસાઇ -સથિયન જ્ઞાાનશેખરને નાઇજીરિયાના એબિઓદિન-ઓમાટાયો સામે ૧૧-૮, ૧૧-૫, ૧૧-૩થી વિજય મેળવીને ભારતને અજેય સરસાઇ અપાવી હતી.

અગાઉ રવિવારે ભારતની મહિલાઓએ પણ ટેબલ ટેનિસની ટીમ ઇવેન્ટમાં ગોલ્ડ મેડલ જીત્યો હતો.  મલેશિયાને ૩-૧થી હરાવીને ભારતે બેડમિન્ટન મિક્સ ટીમ ઇવેન્ટમાં ગોલ્ડ મેડલ જીતી લીધો છે. ભારતની ટીમમાં સાયના નહેવાલ, કિદામ્બી શ્રીકાંત, અશ્વિની પોનપ્પા અને સાત્વિક રાનકીરેડ્ડીનો સમાવેશ થતો હતો. મેન્સ ૧૦ મીટર એર પિસ્તોલ ઇવેન્ટમાં જીતુ રાયે ગોલ્ડ જ્યારે ઓમ મિથારવલે બ્રોન્ઝ મેડલ જીત્યો હતો. જીતુ રાયે ૨૦૧૪ની કોમનવેલ્થ ગેમ્સમાં પણ ૫૦ મીટર એર પિસ્તોલ ઇવેન્ટમાં ગોલ્ડ મેડલ જીત્યો હતો.

કોમનવેલ્થ ગેમ્સ : સોમવારે ભારતના મેડાલિસ્ટ
બેડમિન્ટન મિક્સ ટીમ ફાઇનલ : ગોલ્ડ
ટેબલ ટેનિસ મેન્સ ટીમ ફાઇનલ : ગોલ્ડ
શૂટિંગ મેન્સ ૧૦ મીટર એર પિસ્તોલ : જીતુ રાયને ગોલ્ડ, ઓમ મિથારવલને બ્રોન્ઝ
શૂટિંગ વિમેન્સ ૧૦ મીટર એર રાયફલ : મેહુલી ઘોષને સિલ્વર, અપૂર્વી ચંદેલાને બ્રોન્ઝ
વેઇટલિફ્ટિંગ મેન્સ ૧૦૫ કિગ્રા : પ્રદીપ સિંહને સિલ્વર
 

ભારતનો દબદબો : બેડમિન્ટન, ટેબલ ટેનિસ, શૂટિંગમાં ગોલ્ડ

 Download PDF

ઓસ્ટ્રેલિયાના ગોલ્ડ કોસ્ટ ખાતે યોજાઇ રહેલી કોમનવેલ્થ ગેમ્સના પાંચમાં  દિવસે પણ ભારતીય એથ્લિટ્સની 'ગોલ્ડન' કૂચ જારી રહી છે. સોમવારે ભારત શૂટિંગ, બેડમિન્ટનની મિક્સ ટીમ ઇવેન્ટ અને ટેબલ ટેનિસની મેન્સ ટીમ ઇવેન્ટમાં એમ કુલ ૩ ગોલ્ડ મેડલ જીતવામાં સફળ રહ્યું હતું. ભારતે છઠ્ઠા દિવસે શૂટિંગમાં એક સિલ્વર, બે બ્રોન્ઝ અને વેઇટલિફ્ટિંગમાં સિલ્વર પણ જીત્યા હતા. ભારત રવિવારે પણ ત્રણ ગોલ્ડ મેડલ જીતવામાં સફળ રહ્યું હતું. આ સાથે જ કુલ ૧૦ ગોલ્ડ મેડલ સાથે મેડલ ટેબલમાં ટોપ-થ્રીમાં સ્થાન હાંસલ કરી લીધું છે.

શૂટિંગ : જીતુ રાયે ગોલ્ડ પર નિશાન સાધ્યું

મેન્સ ૧૦ મીટર એર પિસ્તોલ ઇવેન્ટમાં જીતુ રાયે ગોલ્ડ જ્યારે ઓમ મિથારવલે બ્રોન્ઝ મેડલ જીત્યો હતો. જીતુ રાયે ૨૦૧૪ની કોમનવેલ્થ ગેમ્સમાં પણ ૫૦ મીટર એર પિસ્તોલ ઇવેન્ટમં ગોલ્ડ મેડલ જીત્યો હતો. ક્વોલિફાઇંગ રાઉન્ડમાં પાંચમાં સ્થાને આવનારા જીતુ રાયે ફાઇનલમાં ૨૩૫.૧નો જ્યારે મિથારવલે ૨૧૪.૩ના સ્કોર સાથે બ્રોન્ઝ અને ઓસ્ટ્રેલિયાના કેરી બેલે ૨૩૩.૫ના સ્કોર સાથે બ્રોન્ઝ મેડલ જીત્યો હતો. વર્તમાન કોમનવેલ્થ ગેમ્સમાં શૂટિંગમાંથી જ ભારત પાંચ મેડલ જીતી ચૂક્યું છે.નેપાળમાં જન્મેલો જીતુ રાય એશિયન ગેમ્સમાં ગોલ્ડ મેડાલિસ્ટ અને બે વખતનો આઇએસએસએફ વર્લ્ડકપ મેડાલિસ્ટ છે.  

શૂટિંગ : મેહુલીને સિલ્વર, અપૂર્વીને બ્રોન્ઝ

૧૦ મીટર એર રાયફલ પિસ્તોલ ઇવેન્ટમાં ભારતને મેહુલી ઘોષ, અપૂર્વી ચંદેલા પાસેથી ગોલ્ડ મેડલની અપેક્ષા હતી. પરંતુ મેહુલીને સિલ્વર, અપૂર્વીને બ્રોન્ઝથી સંતોષ માનવો પડયો હતો.

બંગાળની ૧૭ વર્ષીય  મેહુલી અને સિંગાપુરની વેલોસો વચ્ચે ગોલ્ડ મેડલના ફેંસલા માટે શૂટઆઉટની મદદ લેવી પડી હતી. જેમાં વેલોસોએ ૧૦.૩ના સ્કોર સાથે ગોલ્ડ મેડલ નિશ્ચિત કર્યો હતો. મેહુલીએ કુલ ૨૪૭.૨નો સ્કોર કર્યો હતો. બીજી તરફ ગત કોમનવેલ્થ ગેમ્સમાં આ જ ઇવેન્ટમાં ભારતને ગોલ્ડ અપાવનારી અપૂર્વીને ૨૨૫.૩ના સ્કોર સાથે બ્રોન્ઝ મેડલથી સંતોષ માનવો પડયો હતો.

કોમનવેલ્થ ગેમ્સના ઈતિહાસમાં ભારતે પ્રથમવાર બેડમિન્ટન ટીમ ઇવેન્ટમાં ગોલ્ડ મેડલ જીત્યો.

મલેશિયાને ૩-૧થી હરાવીને ભારતે બેડમિન્ટન મિક્સ ટીમ ઇવેન્ટમાં ગોલ્ડ મેડલ જીતી લીધો છે. ભારતની ટીમમાં સાયના નહેવાલ, કિદામ્બી શ્રીકાંત, અશ્વિની પોનપ્પા અને સાત્વિક રાનકીરેડ્ડીનો સમાવેશ થતો હતો. કોમનવેલ્થ ગેમ્સના ઈતિહાસમાં ભારતે બેડમિન્ટનની મિક્સ ટીમ ઇવેન્ટમાં પ્રથમ ગોલ્ડ મેડલ જીત્યો છે. ફાઇનલની પ્રથમ મેચમાં મિક્સ ડબલ્સમાં અશ્વિની પોનપ્પા-રાનકીરેડ્ડીની જોડીએ પેંગ સૂન ચાન-લીઉ યિંગ ગોને ૨૧-૧૪, ૧૫-૨૧, ૨૧-૧૫થી પરાજય આપ્યો હતો.

આ પછી વિશ્વમાં બીજા ક્રમાંકિત શ્રીકાંત અને ત્રણ વખતના ઓલિમ્પિક સિલ્વર મેડાલિસ્ટ લી ચોંગ વી વચ્ચે રસપ્રદ મુકાબલો ખેલાયો હતો.જેમાં શ્રીકાંતે ૨૧-૧૭, ૨૧-૧૪થી કારકિર્દીમાં પ્રથમવાર લી ચોંગ સામે વિજય મેળવ્યો હતો. આમ, ભારતે ૨-૦ની સરસાઇ મેળવી લીધી હતી. જોકે, મેન્સ ડબલ્સમાં રાનકીરેડ્ડી-ચિરાગ શેટ્ટીનો પરાજય થતાં ભારતે અજેય સરસાઇ મેળવવાની તક ગુમાવી હતી.  ઓલિમ્પિક સિલ્વર મેડાલિસ્ટ સાયના નહેવાલે સોનિયા ચીને ૨૧-૧૧, ૧૯-૨૧, ૨૧-૯થી હરાવીને ભારતને અજેય સરસાઇ સાથે ગોલ્ડ મેડલ અપાવ્યો હતો. ભારતે શ્રીલંકા, પાકિસ્તાન, સ્કોટલેન્ડ, મોરેશિયસ, સિંગાપુરને હરાવીને ફાઇનલમાં પ્રવેશ કર્યો હતો.

હોકી :ભારતની મેન્સ, વિમેન્સ ટીમને આજે સેમિ.માં પ્રવેશવા તક

કોમનવેલ્થ ગેમ્સ-૨૦૧૮ની વિમેન્સ હોકીની અંતિમ લીગ મેચમાં ભારતનો મુકાબલો મંગળવારે દક્ષિણ આફ્રિકા સામે થશે. ગૂ્રપ 'એ'માં ભારતના હાલ ૩ મેચમાં બે વિજય-એક પરાજય સાથે ૬ પોઇન્ટ છે અને તે પોઇન્ટ ટેબલમાં બીજા સ્થાને છે. આમ, આવતીકાલે ભારતનો મુકાબલો ડ્રો રહે તો પણ તે સેમિફાઇનલમાં પ્રવેશ કરી લેશે. મેન્સ હોકીમાં ભારત મલેશિયા સામે ટકરાશે. આ મુકાબલામાં વિજય ભારતને સેમિફાઇનલની ટિકીટ અપાવશે.

વેઇટલિફ્ટિંગ : પ્રદીપ સિલ્વર મેડલ સાથે ઝળક્યો.

મેન્સ વેઇટલિફ્ટિંગના ૧૦૫ કિગ્રા વજનજૂથમાં ૨૨ વર્ષીય પ્રદીપસિંહે ભારતને સિલ્વર મેડલ અપાવ્યો છે. પ્રદીપસિંહે કુલ ૩૫૨ કિગ્રા (૧૫૨ કિગ્રા સ્નેચમાં, ૨૦૦ કિગ્રા ક્લિન જર્કમાં) વજન ઉંચક્યું હતું. સમોઆના સેનેલે માઓએ ૩૬૦ કિગ્રા (૧૫૪ અને ૨૦૬) સાથે ગોલ્ડ મેડલ પોતાને નામે કર્યો હતો. કોમનવેલ્થ યુથ, જુનિયર એન્ડ સિનિયર વેઇટલિફ્ટિંગ ચેમ્પિયનશિપમાં ગોલ્ડ મેડલ જીતીને પ્રદીપે કોમનવેલ્થ ગેમ્સ માટે ક્વોલિફાઇ કર્યું હતું. તેણે આજે સિલ્વર મેડલ સાથે નેશનલ પણ પોતાને નામે કર્યો હતો.

ટેબલ ટેનિસ : મેન્સ ટીમને પણ ગોલ્ડ

ટેબલ ટેનિસમાં  વિમેન્સ ટીમ બાદ મેન્સ ટીમે પણ ભારતને ગોલ્ડ મેડલ અપાવ્યો છે. ટીમ ઇવેન્ટની ફાઇનલમાં ભારતે નાઇજીરિયા સામે ૩-૦થી વિજય મેળવ્યો હતો. અચંતા શરત કમલે બોડે એબીઓડુનને ૪-૧૧, ૧૧-૫, ૧૧-૪, ૧૧-૯થી જ્યારે સથિયન જ્ઞાાનશેખરને સિગુન તોરિઓલાને ૧૦-૧૨, ૧૧-૩, ૧૧-૪થી હરાવીને ભારતને ૨-૦ની લીડ અપાવી હતી. આ પછી મેન્સ ડબલ્સમાં સુરતના હરમીત દેસાઇ-સથિયને એબિઓદિન-ઓમાટાયો સામે ૧૧-૮, ૧૧-૫, ૧૧-૩થી વિજય મેળવીને ભારતને ૩-૦ની અજેય સરસાઇ સાથે ગોલ્ડ મેડલ અપાવ્યો હતો.
ભારતની મેન્સ ટીમે ટેબલ ટેનિસની મિક્સ ઇવેન્ટમાં પ્રથમવાર ગોલ્ડ મેડલ જીત્યો છે.


મેડલ ટેબલ

રેન્ક	દેશ	ગોલ્ડ	સિલ્વર	બ્રોન્ઝ	કુલ
૧.	ઓસ્ટ્રેલિયા	૩૯	૩૩	૩૪	૧૦૬
૨.	ઇંગ્લેન્ડ	૨૨	૨૫	૧૬	૬૩
૩.	ભારત	૧૦	૦૪	૦૫	૧૯
૪.	ન્યૂઝીલેન્ડ	૦૮	૦૯	૦૬	૨૩
૫.	દક્ષિણ આફ્રિકા	૦૮	૦૫	૦૫	૧૮
૬.	કેનેડા	૦૭	૧૭	૧૩	૩૭
૭.	સ્કોટલેન્ડ	૦૬	૦૮	૧૧	૨૫
૮.	વેલ્સ	૦૬	૦૬	૦૪	૧૬
૯.	સાયપ્રસ	૦૪	૦૦	૦૨	૦૬
૧૦.	સમોઆ	૦૨	૦૨	૦૦	૦૪