આજથી ઈન્ડોનેશિયામાં એશિયન ગેમ્સના ઉદ્ઘાટનનો પ્રારંભ

- એશિયાના 45 દેશોના 10,000થી વધુ ખેલાડીઓ વચ્ચે 40 રમતોની 465 ઈવેન્ટ્સમાં શ્રેષ્ઠતા સાબિત કરવાનો મેગા મુકાબલો

- સાંજે ૫.૩૦થી ઉદ્ઘાટન સમારંભ યોજાશે

એશિયાના સૌથી મોટા રમતોત્સવ - ૧૮મી એશિયન ગેમ્સનો આજ્થી(18 ઓગસ્ટ) ઈન્ડોનેશિયાના જકાર્તા-પાલેમ્બાગ ખાતે પ્રારંભ થઈ જશે. તારીખ બે સપ્ટેમ્બર સુધી યોજાનારી એશિયન ગેમ્સમાં ભારત સહિત ૪૫ દેશોના ૧૦,૦૦૦થી વધુ ખેલાડીઓ વચ્ચે ગોલ્ડ મેડલ માટે હરિફાઈ યોજાશે. જકાર્તા-પાલેમ્બાગ એશિયાડ તરીકે ઓળખાતી આ ગેમ્સમાં કુલ ૪૦ રમતોની ૪૬૫ ઈવેન્ટસના ગોલ્ડ મેડલ દાવ પર મુકાશે. એશિયન ગેમ્સમાં પરંપરાગત રીતે ચીનનું પ્રભુત્વ જોવા મળતું હોય છે. ભારતે આ વખતના એશિયાડમાં ૫૭૨ ખેલાડીઓને જુદી-જુદી ૩૬ રમતોમાં સ્પર્ધામાં ઉતારવાનો નિર્ણય લીધો છે. 

આજ્થી(18 ઓગસ્ટથી) જકાર્તામાં એશિયન ગેમ્સના ઉદ્ઘાટનનો પ્રારંભ થશે, ત્યારે ભારતમાં સાંજના ૫.૩૦ વાગ્યા હશે. ઉદ્ઘાટન સમારંભમાં ઈન્ડોનેશિયાની સંસ્કૃતિની ઝલક જોવા મળશે. તેની સાથે સાથે કલા અને સંગીતની સાથે રંગારંત આતિશબાજી પણ ઉપસ્થિત ચાહકોનું મન હરી લેશે. આ સાથે ૧૮મી એશિયન ગેમ્સનો સત્તાવાર પ્રારંભ થશે. આયોજકોએ એશિયન ગેમ્સની ફૂટબોલ, હેન્ડબોલ, બાસ્કેટબોલ સહિતની કેટલીક રમતોની ગૂ્રપ મેચનો તો થોડા દિવસ પહેલા જ પ્રારંભ કરી દીધો છે. આવતીકાલે ઉદ્ઘાટન સમારંભમાં સાંસ્કૃતિક અને સંગીતમય કાર્યક્રમ બાદ ભારતીય સમય પ્રમાણે સાંજે ૬.૧૫ વાગ્યાથી દેશોની પરેડ શરૃ થશે.

ભારતના ૩૬ રમતોમાં ૫૭૨ ખેલાડીઓ

૧. તીરંદાજી ( ૧૬ ખેલાડી) 

૨. એથ્લેટિક્સ (૫૦ ખેલાડી) 

૩. બેડમિંટન (૨૦ ખેલાડી) 

૪. બાસ્કેટબોલ (૧૨ મહિલા)

૫. બોક્સિંગ (૧૦ ખેલાડી)

૬. બોલિંગ (૬ ખેલાડી)

૭. બ્રિજ (૨૪ ખેલાડી) 

૮. કેનોઈ-ક્યાક (૪૯ ખેલાડી)

૯. સાઈક્લિંગ (૧૫ ખેલાડી)

૧૦. ઘોડેસ્વારી (૭ ખેલાડી)

૧૧. ફેન્સિંગ (૪ ખેલાડી)

૧૨. જિમ્નાસ્ટીક-આર્ટિસ્ટિક (૧૦)

૧૩. ગોલ્ફ (૭ ખેલાડી)

૧૪. હેન્ડબોલ(મેન-વિમેન) (૩૨)

૧૫. હોકી (મેન-વિમેન) (૩૬ ખેલાડી)

૧૬. જુડો (૬ ખેલાડી) 

૧૭. કબડ્ડી (મેન-વિમેન્સ)  (૨૪) 

૧૮. કરાટે (૨ ખેલાડી) 

૧૯. કુરાશ (૧૪ ખેલાડી) 

૨૦. પેન્કાક સિલાટ (૩ ખેલાડી) 

૨૧. રોલર્સસ્પોર્ટ્સ (૪ ખેલાડી)

૨૨. રોવિંગ (૩૪ ખેલાડી)

૨૩. સેઇલિંગ (૯ ખેલાડી) 

૨૪. સેપાક ટકરાવ (૨૪ ખેલાડી)

૨૫. શૂટિંગ (૨૮ ખેલાડી)

૨૬. સ્ક્વોશ (૮ ખેલાડી) 

૨૭. સ્વિમિંગ (૧૨ ખેલાડી)

૨૮. સ્પોર્ટ ક્લાઈમ્બિંગ (૩ ખેલાડી) 

૨૯. ટેનિસ (૧૨ ખેલાડી) 

૩૦. ટેક્વોન્ડો (૮ ખેલાડી)

૩૧. સોફ્ટ ટેનિસ (૧૦ ખેલાડી) 

૩૨. ટેબલ ટેનિસ (૧૦ ખેલાડી 

૩૩. વોલીબોલ (મેન-વિમેન) (૨૮)

૩૪. વેઈટલિફ્ટિંગ (૪ ખેલાડી)

૩૫. કુસ્તી (૧૮ ખેલાડી) 

૩૬. વુશુ (૧૩ ખેલાડી)

ઉદ્ઘાટનમાં 'એનર્જી ઓફ એશિયા'નો થીમ

જકાર્તામાં યોજાનારી એશિયન ગેમ્સના ઉદ્ઘાટનનો થીમ 'એનર્જી ઓફ એશિયા' રાખવામાં આવ્યો છે. આ સ્લોગનને આધારે તૈયાર કરવામાં આવેલા ઉદ્ઘાટન સમારંભમાં ઈન્ડોનેશિયાના જાણીતા ગાયકો અને પર્ફોમર્સ પોતાનો કમાલ દેખાડશે. ઉદ્ઘાટનમાં ઈન્ડોનેશિયન ગાયિકા એન્ગન, રાઈસા, તુલુસ, એડો કોન્ડોલોજીટ, પ્યુટ્રી એયુ, ફાતીન, કામાસેએન અને વિયા વાલેન જેવા સ્ટાર્સનું પર્ફોમન્સ જોવા મળશે. ક્રિએટીવ ડાયરેક્ટર તરીકે વિશ્નુતામા કામ કરી રહ્યા છે. જેઓ નેટ મીડિયાતામા ટીવીના સીઇઓ પણ છે. ઉદ્ઘાટન સમારંભમાં જુદા-જુદા ૪,૦૦૦ જેટલા પર્ફોમર્સનો જાદુ જોવા મળશે. ઈન્ડોનેશિયાને મળેલા કુદરતી વૈભવની ઝલક પણ સ્ટેડિયમમાં દર્શાવવામાં આવનાર છે.

ભારત રત્ન અટલ બિહારી વાજપેયીનાં અંગત જીવનની કેટલીક રસપ્રદ વાતો

 

- અટલ બિહારી વાજપેયીનું ૯૪ વર્ષની વયે દિલ્હી સ્થિત એમ્સમાં નિધન

 

ત્રણ વખત દેશનાં વડાપ્રધાન રહી ચુકેલા લોકલાડીલા નેતા અટલ બિહારી વાજપેયીનું ૯૪ વર્ષની વયે દિલ્હી સ્થિત એમ્સમાં નિધન થયું હતું. વાજપેયી લોકપ્રિય વડાપ્રધાન ઉપરાંત ઉત્તમ વક્તા, કવિ અને પત્રકાર પણ હતાં. કવિતાઓ ઉપરાંત તેઓ ફુટબોલ, હોકી, ફિલ્મોનાં પણ શોખિન હતાં.

અહીં તેમના જીવનની કેટલીક ઓછી જાણીતી બાબતો રજૂ કરવામાં આવી છે.

*તેમનાં જીવનનો ઉદ્દેશ્ય - પોતાના જીવનનાં ઉદ્દેશ્ય અંગે તેમણે કહ્યું હતું કે 'હું જીવનનાં દરેક તબક્કે મારા ભાગની જવાબદારી ગંભીરતાથી નિભાવવા માંગું છું. ભારતને એક મહાન રાષ્ટ્રરૃપે જોવા માંગું છું.'

* જીવનની સૌથી દુઃખી ક્ષણો - પોતાના પિતાને ગુમાવ્યાનો અફસોસ. વાજપેયીને આજીવન રહ્યો હતો.

* નજીકના મિત્રો - લાલ કૃષ્ણ અડવાણી, ભૈરવસિંહ શેખાવત, એન એમ ઘટાટે, જસવંત સિંહ, મુકુંદ મોદીને વાજપેયીએ પોતાના ખાસ મિત્રો ગણાવ્યા હતાં.

* પસંદગીનો પરિધાન - વાજપેઇને ધોતી-કુર્તો ઉપરાંત ખાસ પ્રસંગો પર પઠાણી સૂટ પહેરવો ગમતો હતો.

* ગમતા સ્થળો - મનાલી, અલ્મોડા, તથા માઉન્ટ આબુ.

* પસંદગીનો રંગ - વાદળી. પસંદગીની ડીસ - માછલી, ચાઇનીઝ, ખિચડી, ખીર, તથા માલપુઆ.

* દિલ્હીમાં ભોજન માટેની પસંદગીની જગ્યાઓ - પરાઠા ગલી, સાગર તથા ચુંગવા.

* પ્રિય શાસ્ત્રીય ગાયકો - ભીમસેન જોશી, અમજદ અલી ખાન, તથા હરિપ્રસાદ ચૌરસીયા.

* હિન્દી ફિલ્મનું ગમતું ગીત - આર ડી બર્મનનાં કંઠે ગવાયેલું 'ઓ માંઝી' તથા મુકેશ અને લતા મંગેશકરે ગાયેલું 'કભી કભી મેરે દિલમેં' ખૂબ પ્રિય હતું.

* પ્રિય ગાયકો - લતા મંગેશકર, મુકેશ તથા મોહમ્મદ રફી.

* પસંદગીની હિંદી ફિલ્મો - દેવદાસ,  બંદીની, તથા તીસરી કસમ.

* ગમતી અંગ્રેજી ફિલ્મો - 'ગાંધી', 'બોર્ન ફ્રી', અને 'બ્રાઈડ ઓવર રિવર કવાઈ'

* પ્રિય હિન્દી કવિઓ - નિરાલા સૂર્યકાંત ત્રિપાઠી, બાલકૃષ્ણ શર્મા નવીન, જગન્નાથ પ્રસાદ મિંલિંદ, ફૈઝ (ઉર્દુ)

 

વિદેશમાં ભારતના ઐતિહાસિક ટેસ્ટ શ્રેણી વિજયના કર્ણધાર વાડેકરનું નિધન

 

- ૧૯૭૧માં વિન્ડિઝ અને ઈંગ્લેન્ડની ભૂમિ પર વાડેકરની આગેવાનીમાં ભારતે સૌપ્રથમ ટેસ્ટ શ્રેણી જીતવાનો રેકોર્ડ નોંધાવ્યો હતો

 

- ક્રિકેટર અને કેપ્ટન તરીકેની સફળતા મેળવ્યા બાદ વાડેકરે કોચ તેમજ સિલેક્ટર તરીકે પણ અસરકારક ભૂમિકા ભજવી હતી : ૭૭ વર્ષના વાડેકર છેલ્લા કેટલાક સમયથી બીમાર હતા : આવતીકાલે અંતિમક્રિયા યોજાશે

 

ઈ.સ.૧૯૭૧માં ભારતને વેસ્ટ ઈન્ડિઝ અને ઈંગ્લેન્ડની ભૂમિ પર ઐતિહાસિક ટેસ્ટ સિરિઝ વિજય અપાવનારા કેપ્ટન અજિત વાડેકરને ૧૫મી ઓગસ્ટે હાલત વધુ ગંભીર બનતાં  હોસ્પિટલમાં ખસેડવામાં આવ્યા હતા, જ્યાં તેમનું ૭૭ વર્ષની વયે અવસાન થયું હતુ.વાડેકર લાંબા સમયથી કેન્સરની બીમારીથી પીડાઈ રહ્યાં હતા.

ભારતીય ક્રિકેટ જગતને કેપ્ટન તરીકે દુનિયાભરમાં ગૌરવ અપાવનારા ક્લાસિકલ ડાબોડી બેટ્સમેન અજીત વાડેકરે ખેલાડી તરીકેની નિવૃત્તિ બાદ ટીમ ઈન્ડિયાના કોચ તરીકે તેમજ સિલેક્ટર તરીકે પણ ક્રિકેટની સેવા કરી હતી. 

 

વાડેકરના નિધનને કારણે ભારતીય ક્રિકેટ જગતમાં શોકની લાગણી ફેલાઈ હતી. વાડેકર તેમની પાછળ તેમની પત્ની રેખા અને બે પુત્રો તેમજ એક પુત્રીને વિલાપ કરતાં છોડી ગયા છે.

આક્રમક બેટ્સમેન તરીકે જાણીતા વાડેકરે ૩૭ ટેસ્ટ મેચ રમી હતી. તેમણે ટેસ્ટ ક્રિકેટર તરીકે ૨,૧૧૩ રન ફટકાર્યા હતા અને ભારતની સૌપ્રથમ વન ડેમાં કેપ્ટન તરીકેની જવાબદારી પણ સંભાળી હતી.