PCI-Current Affairs

છેવટે રાતે બે વાગ્યે પ્રમોદ સાવંતે ગોવાના મુખ્યમંત્રી તરીકે શપથગ્રહણ કર્યાં

ભારે ગડમથલ બાદ છેવટે પ્રમોદ સાવંત ગોવાના નવા મુખ્યમંત્રી બન્યાં છે. વિધાનસભા અધ્યક્ષ રહેલાં પ્રમોદ સાવંતે મંગળવારે રાતે લગભગ પોણા બે વાગ્યે રાજભવન ખાતે ગોવાના મુખ્યમંત્રી તરીકે શપથગ્રહણ કર્યા. તેમની સાથે 11 ધારાસભ્યોએ પણ મંત્રીપદના શપથ લીધાં.

પ્રમોદ સાવંતની સરકારમાં બે નાયબ મુખ્યમંત્રી રહેશે. મહારાષ્ટ્ર ગોમાંતક પાર્ટીના સુધિન ધવલીકર અને ગોવા ફોરવર્ડ પાર્ટીના અધ્યક્ષ વિજય સરદેસાઇ નાયબ મુખ્યમંત્રીનું પદ સંભાળશે. એ સિવાય તમામ મંત્રીઓ એ જ રહેશે જે મનોહર પર્રિકરની સરકારમાં મંત્રી હતાં. 

અગાઉ રવિવારે મનોહર પર્રિકરના નિધન બાદ ગોવામાં રાજકીય હિલચાલ વધી ગઇ હતી. પહેલાં કોંગ્રેસે પણ સરકાર બનાવવાનો દાવો રજૂ કર્યો હતો. રવિવારે સાંજે કેન્દ્રીય મંત્રી નિતિન ગડકરી ગોવા પહોંચ્યાં, મળતી માહિતી મુજબ પહેલા સુધિન ધવલીકર અને વિજય સરદેસાઇ બંનેએ મુખ્યમંત્રીપદની માગણી કરી હતી.

છેવટે ભાજપ અધ્યક્ષ અમિત શાહે દરમિયાનગીરી કરીને બે નાયબ મુખ્યમંત્રી વાળી ફોર્મ્યૂલા સૂચવી. 40 સભ્યોવાળી ગોવા વિધાનસભામાં હાલ 36 સંખ્યા છે અને ભાજપ પાસે 20 ધારાસભ્યોનું સમર્થન છે.